Oyanıb durmalıdır arxa bu millət Vətənə
Düşmənə qarşı bu El qurmalı vəhdət Vətənə
Ləşkəri-zülməti biz qovmalıyıq ki bir gün
Saça Həqqin günəşi nuri-səadət Vətənə
Oyanın ey Vətən övladları qeyrət dəmidir
Gedəlim göstərəlim indi şücaət Vətənə.
Qanımızla suluyaq torpaqını yurdumuzun
Bitə Hürr adlı çiçəklər verə zinət Vətənə
Kişinin cəng günü evdə qadın tək nə işi
Kişi səngərdə edə can ilə xidmət Vətənə
Vətən uğrunda kişi canlı sipər olmalıdır
Ki verə ismi onun eldə şərafət Vətənə
Düşmənə odlu silah ilə cəhənnəm yaşadaq
Girməsin kafir olan kimsə bu cənnət Vətənə
Qoymaz heç vəqti qoya yurduna biganə qədəm
Hər kimin var isə könlündə məhəbbət Vətənə
Az qalıb saqi verər cami-şəhadət Mühriq
Səni çox qoymayacaqdır daha həsrət Vətənə
Müəllif; Alim Mühriq
0 Rəy:
Yorum Gönder