VƏTƏNƏ DAYAQ - Sevil Gül Nur

VƏTƏNƏ DAYAQ

Vətən çağıranda köməyə səni

Övladlıq borcunu verməyə getdin.

Torpağı qoruyub mənfur yağıdan,

Hər dağın, hər daşın hayına yetdin.

Səni salamladı vətən çölləri,

Doğma ana kimi basdı bağrına.

Bu haqq savaşında zəfər çalmağa

Xeyir-dua verdi igid oğluna.

Atıldın meydana bir aslan kimi,

Güllələr dolutək yağdı başına.

Bütün varlığını qurban eylədin

Vətən torpağının hər qarışına.

Gəlişin düşməni saldı lərzəyə,

Tab edə bilmədi önündə sənin.

Qovub torpağımdan qaniçən yadı

Fəxrinə çevrildin ana vətənin.

Adın dildə gəzir, sevgin ürəkdə,

Gör neçə ürəyin bəzəyisən sən!

Bu vətən mülkünün dayaq nöqtəsi,

Bu vətən mülkünün özəyisən sən!

Müəllif; Sevil Gül Nur